Ing dina iki Yesus maringi piwulang bab resik lan suker (ora resik). Kabeh wis mesti kelingan sabda iki:”Ora ana barang saka njaba mlebu ing manungsa, sing bisa gawe sukere, nanging sing metu saka manungsa iku sing gawe suker.” Lire: sing mlebu manungsa iku mlebu weteng, lan akhire ana pakiwan.
Beda karo sing metu saka manungsa, iku sing kudu digatekake. Sabda Yesus: Marga saka njero, saka atining manungsa iku sangkaning pikiran ala, laku jina, colong-jupuk, rajapati, laku bandrek, melik pamrih, pokal ala, tumindak apus-apus, royal, meri, nyamah Allah, umuk, sembrana. Iku kabeh mau kang gawe suker, iku kabeh mau dosa, asale saka ati. Mula iya kelingan Sabda Rahayu: Rahayu wong kang resik ing ati, awit bakal nyawang Allah.
Gusti nyadong berkah sageda tansah resik ing ati, supados mboten damel pikiran ala, dosa lan samangke saged nyawang Allah ing urip padintenan.