Maca Injil (basa Jawa) ing dina iki, ketemu ukara loro sing wis ora pati sering dienggo: ulon-ulon lan dagan. Kudu mbukak kitab Baoesastra Djawa anggitanipun WJS Poerwadarminta kanggo mangerti ukara mau. Supaya apa? Supaya bisa mbayangake apa sing ditemoni Maria Magdalena sawetara nemoni kuburan Yesus kosong.
Ulon-ulon diterangke papan kang kapernah ing endas. Lan dagan diterangkake papan kang kapernah ing sikil (tmr. wong turu, kuburan). Mesti wae ukara iki wis ora akeh sing nganggo, iki ukara kalebu ukara kawi (kw) utawa kuna (kn).
Sakwise ngerti ukara iki, banjur gampang lan isa mbayangke lan melu teka nang panggonan Maria Magdalena nemoni kuburan Yesus kosong. Bayangan swasana sing rada peteng, singup, wangi arum ganda lan lenga sing diborehake, ambu getih sing wis garing, sepi mamring sakalan gampang ditekakake. Nek melu ana kana, apa sing dadi gronjalaning ati? Apa rasa sing dirasa? Iku isa dadi donga.
Gusti Allah, matur nuwun sedaya sampun kula tampi lan mugi sageda kados Maria Magdalena anggenipun sumerep Gusti lan martosaken kangge sapa kemawon. Amin.