Waosan dina iki akeh prilaku sing bisa diconto: wuta, ora weruh, nanging nggunakake pamireng kanggo ngerteni sapa sing ana kana; wuta, ora weruh, nanging percaya karo kandane wong-wong: Sri Yesus saka Nasaret langkung; nguwuh nyuwun diambali bola-bali: nyuwun kawelasan; manah Yesus sing asih tresna: kowe njaluk tak kapakake?; panjaluke wong wuta mau ora malih: kula nyuwun sumerep. Ora mung tekan kono. Nalika bisa weruh: nderekake Gusti Yesus kanthi ngluhurake Allah.
. Jan akeh banget sing bisa dienggo, piye dadi murid Yesus: penuh percaya, ora kendat olehe nyenyuwun, nyuwun sing paling dibutuhake, lan terus ngluhurake Allah. Uga kita bisa kaya Yesus: nduweni rasa sih lembah manah karo sing sapa wae manungsa tunggal kita. Yen durung kabeh bisa kita tindakake, oleh wae saiki mung: nduweni rasa percaya (marang Gusti Allah lumantar Yesus putra ontang-anting lan Roh Kudus pamomong). Sabanjure kita butuh usaha lan landasan percaya, bakal kadadean apa sing ana ing waosan dina iki.
Gusti Allah nyadong rahmat sageda aweh rasa sih tresna marang sapa wae ing urip padintenan, luwih-luwih sing mbutuhake pertolongan.