Waosan ing dina iki (Mat. 7: 7-12) Yesus wewarta bab ampuhing sembayangan. ‘Nyuwuna lan kowe bakal diparingi; golekana, mengko bakal ketemu; thothok-thothoka, mengko kowe bakal diwengani.” Terus dibandingake manungsa sing ala wae bakal menehi paweh becik marang anake sing nduweni panjaluk.
Saka warta iku jelas banget, apa sing kudu ditindakake manungsa: nyuwun, golek, thothok-thothok. Ukara iku wujud ukura aktif, manungsa ora mung nduweni pengarep nanging tansah kudu ndendonga (nyenyuwun), golek (nindakake apa sing didongake), lan thothok-thothok (nyenyuwun kanthi temenan). Iki uga ngemu gagasan yen manungsa kang ngandalake Gusti Allah kudu tansah nduweni rasa cedak lan ora wigah-wigih anggone nyenyuwun lan bareng Gusti wujudake apa sing dipengarep.
Gusti nyadong rahmat sageda tansah saged caket-rumaket kaliyan Gusti lan nindakake punapa kemawon ingkang perlu wonten ing urip padintenan punika.